جرب تكتب

في الموضوع ده هنكتب قصص من خيالنا أو من الواقع , مش مهم تكون قصة متقنة ومنقحة والكلام ده
لا انا عايزكم تكتبو اللي انتو عايزينه

حتى لو كانت خمس سطور بس

وعايز الموضوع ده يكون متنفس تكتب في اللي انت عايزه ( في الحدود المتفق عليها ) بالطريقة اللي انت عايزها .


الاهم من الكلام ماوراء الكلام

يوم من عمري

حاسس ان كل يوم من حياتك هو نفس اليوم اللي قبله ؟ زهقت من الروتين القاتل في حياتك ؟ زهقت من الطريق الل انت بتمشي فيه عشان تروح الكلية أو الدرس كل يوم ؟ طب ليه ما تحاولش تخلي كل يوم من حياتك يوم جديد بمعنى انك تفكر بطريقة جديدة . ازاي ؟؟؟؟؟؟؟؟؟؟
الطريق اللي انت بتمشي فيه دايما , أكيد مش هيتغير كطريق بس الاحداث اللي فيه هتتغير , عربيات بتعدي وناس بتمشي وده بيتكلم وده قاعد وده واقف وفي قطة ماشية !!!! حول حياتك للعبة مثلا كل عربية ماشية حاول تحفظ رقمها ولو في حد ماشي في الطريق وسبقك حاول تسبقه !!!!!!! أكيد هتقول علي عبيط بس جرب عيش كل يوم بأحداثه وما تعيشهوش بمكانه هتلاقي فرق وما تفكرش في بكرة اعمل اللي عليك النهردة وهتلاقي بكرة بقى أحسن لوحده ومش معنى كده ان الواحد يبطل يخطط ويبطل يشوف ايه اللي باقيله وايه الواجبات اللي عليه لا بس الحاجات دي ما تشغلش دماغك بحيث تحبطك جرب وابدأ هتلاقيها بتمشي . ما تقلش بقيلي كتير في الماده دي وكتير أوي في المادة دي وما فتحتش الماده دي , لو قلت كده صدقني مش هتذاكر أصلا ومش هتحقق تقدم ابدأ وانوي هتلاقيها بتمشي .


وزي ما قلت غير من طريقة تفكيرك


from Night Wolf

انا جربت أهو يا ريت غيري يجرب اعرض وجهة نظرك سواء من الخيال أو الواقع وما فيش قيد عليك وكل حاجة وجهة نظر

والله وانا بٌرأ في الأول فكرتك عامل إعلان لحاجه يا عم
بس فعلاً عندك حق اللي بيفكر كتير من غير ميعمل حاجه عمره ما هيحقق تقدم هيحبط نفسه عال فاضيي

تحفة بس انا بعمل كدة اساسا (( الجنون اللي في الول واشوط طوب ولازم يخبط في اللي قدامي )) لا وغيرة كتير

شكرا يا عمرو

amr adel كتب:

تحفة بس انا بعمل كدة اساسا (( الجنون اللي في الول واشوط طوب ولازم يخبط في اللي قدامي )) لا وغيرة كتير

دا غير زق اصحابك وكعبلتهم طول منتا ماشي و.و..........و............

الموضوع 2

عندك كام سنة؟؟؟؟

الانسان أول ما اتولد اشتغلت ساعتين في عمره ساعة بتعد والثواني بتاعتها بتزيد
بتقلك انت عشت قد ايه لحد دلوقتي وساعة تانية بتعد لتحت والثواني بتاعتها بتقل ولما الساعة اللي بتقل تقف هتسيب الدنيا بس الأمر صعب شوية انت مش عارف الساعة الأولانية هتعد لامتى ولا الساعة التانية هتقف امتى ممكن تقف النهردة مش بعيد تقف دلوقتي ومش بعيد بكرة ومش بعيد برضو بعد 100 سنة بس امتى محدش يعرف إلا ربنا سبحانه وتعالى .
نيجي لسؤال الموضوع انت عندك كام سنة ؟؟ معظم اللي على المنتدى عندهم 18
سنة وفي 17 وفي 19, السؤال اللي أنا عايز كل واحد منكم يسأله لنفسه هو , انت عملت ايه في السنين اللي فاتو دي في ناس مش هتقول حاجة وفي ناس هتعد تقول حاجات كتير بس مش هي دي النقطة انا ميهمنيش انت عملت ايه اللي يهمني هل انت باللي عملته ده راضي عن نفسك حاسس انك حققت حاجة على المستوى الشخصي أنا عن نفسي مش شايف اني حققت عشان كده مش عايز أضيع أكتر من عمري وهبدأ أخلي هدف لكل حاجة بعملها العم اللي احنا بنتعلموا ده لو الواحد خدوا علشان ينجح ويعدي السنة وخلاص لو حولنا العلم ده الى رغبة وهوايه صدقني هتحب اللي انت بتاخده وهتحس انك عملت حاجة بجد .

from : Night Wolf


وعايز أشوف ردودكم

موضوع جميل اوي يا نايت

فعلا الواحد المفروض يحط هدف قدامة ويحاول يوصلة باي طريقة .. وكمان الانسان لو اعد يعد هو حقق اية واية واية طول السنين اللي فاتت دي وحس انة فعلا حقق حاجات كتير وانة راضي عن نفسة عمرة ما هيكون احسن خاااااااالص مهما عمل
لكن دة مش معناه انة يحطم نفسة وميديش اعمالة دي قدرها .. لا المفروض يفرح فعلا باللي حققة بس برضو يطمح للافضل عشان يقدر يطلع كل مواهبة وقدراتة يعني مش يكون راضي عن نفسة وعن اعماله السابقة فيبدا يتكاسل
انا كمان سمعت او قرات _ مش فاكرة _ عن موضوع الرضا عن النفس دة في معاملاتك مع ربنا سبحانة وتعالي
انك لو رضيت عن نفسك اووووي مهما كنت بتعمل من عبادات واعدت تقول ان ربنا راضي عنك وان مفيش حد بيعمل زي ما انت بتعمل في عباداتك ( اي عمل يرضي الله يعني ) كدة يبقي انت عمرك ما هتوصل لدرجة رضا الله دي ... لازم دائما تحسس نفسك انك مقصر ولو بسيط عشان تطمع انك ترضي ربنا اكتر واكتر وبكدة تاخد ثواب اكبر

.......................................................

واما اننا نخلي العلم اللي بنتعلمة دة زي هواية ونستمتع بمذاكرتة ففي دي انت عندك حق بجد
انا فعلا مثلا في الاناتومي السنة اللي فاتت كنت حابة المادة جدا ومستمتعة بيها وفي الاخر الحمد الله حققت حاجة كويسة فيها .. والعكس صحيح بلاش فضايح

ففعلا لو حاولنا نستمتع باعمالنا كلها طوول اليوم زي ما انت قلت في موضوعك دة والموضوع اللي قبلة اكيد هنحقق نتائج احسن كتير وكمان هناخد ثواب كبير لاننا قبل كل عمل هنحدد اهدافنا وبكدة هنكون ناوينا خير واي عمل المفروض قبل ما نبداه نسبقة بالنية وعشان كدة كمان هنكون رضينا ربنا

يا جماعة ادخلوا اكتبوا أي موضوع أي حاجة قولوا رأيكم في الكلام اللي انا كاتبه من وجهة نظرك ده صح ولا غلطولو مش عايز اكتب رأيك انت في أي موضوع وفي أي حاجة انت عايزها .

قولوا رأيكم مثلا في الورقة الخضرة اللي متعلقة اليومين دول في ممر الجوالة

حاجة شغلاني

في حاجة في دماغي بقالها كام يوم كده مش عارف ليه هي الموت عمال أتخيل لو أنا مت مين هيزعل علي ومين مش هياخد في باله ومين مش مهم أساسا عندو اني مت ومين ومين سؤال غريب بسأله لنفسي هل أنا عملت حاجات كويسة تخلي الناس تتفتكرني بالخير ولا أنا مزعل ده ومخاصم ده ومابكلمش ده طب ليه لايبقى من الانسان إلا السيرة الطيبة وساعات بسأل أنا مستعد للحظة دي ولا لأ مع انها ممكن تكون أي لحظة لا أنا ولا انت نعرف بس سؤال ولازم أسأله لنفسي مش مهم عندي مين هيزعل ومين مش هياخد في باله مش هو ده المهم المهم هو هل انت جاهز للحظة دي ولا لأ لحظة يجيلك فيها ملك الموت عشان ينزع روحك ساعتها مش هتقدر تقله استنى أصلح الغلط مش هينفع ومش هيفيد الندم هتروح لحفرة مترين في نص متر يااااااااااااه ديقة اوي لكن والله ممكن تكون ليك جنة وممكن تكون ............... وبكده تنتهي زيارتك للدنيا فخلي زيارتك للدنيا بالخير وخليك ضيف جميل الكل يفتكره لو رحل وهتبدأ حياة تانية يارب تكون كلها سعادة .

ياريت كلنا نبقى مستعدين للحظة دي وربنا يحسن ختامنا جميعا بس فكر لو أنا مت هيحصل ايه؟؟؟؟؟؟؟

الموضوع ده قديم شوية بس حبيت أرد فيه تاني يمكن حد يحب يكتب فيه أو يقول رأيه .......... وده طبعا غير اللي بيتكتب في منتدى مواهب السكاريت

الموضوع حلو حسسني اني فعلا محتاجة اتكلم
انا لما بكون مضايقة بكتب في ورقة كل اللي مضايقني و بعدين بقطع الورقة و ارميها وبرتاح شوية حتي لو المشكلة لسة ما اتحلتش بس يعني يمكن تكون راحة نفسية
لكن في ورقة كتبتها يوم 4\3الورقة دي مش قادرة ارميها و كمان كل كلمة فيها محفورة في .اليوم ده كان بعد موت بابا بيوم اللي كنت
اتمني يكون كابوس واصحي منه لكن للاسف ماصحتش لاني ماكنش نايمة اصلا
اصل الاحداث كانت سريعة سريعة لدرجة فعلا حست انه ....................لكن قدر الله و ما شاء فعل
النهاردة فات شهرين انا فعلا مش عارفة ازاي يمكن لان فعلا بابا دائما معايا بس للاسف في الحلم بس
يارب ارحم كل اموات المسلمين
يا رب قوينا بالايمان والصبر علي مصائب الدنيا
انا مش عارفة ده مش موضوع كتابة بس حاجة كنت عايزة اتكلم فيها و خلاص ممكن تكون فضفضة او اي حاجة
واجابة علي نايت ان اللحظة اللي هموت فيها تقريبا هتكون اسهل من اللحظة اللي افقد فيها حد تاني