مشربتش من نيلها ؟؟

الاغنية دي كانت معلقة معايا من قريب شوية مش عارفة لية وبعدين خلاص نسيتها
ودلوقتي رجعت افتكرتها ومعلقة معايا تاني ....... فقلت يبقي اكيد لازم اجيبهالكم

بس بجد كلمات الاغنية اكثر من رائعة فعلااااااااا

..........................................................


بلدنا أمانة فى إيدينا نعليها مادام عايشين


نعيش فيها سنين و سنين و إحنا مطمنين

ما شربتش من نيلها؟ طب جربت تغنيلها؟؟

جربت فى عز ما تحزن تمشى فى شوارعها و تشكيلها

ما مشيتش فى ضواحيها؟ طيب ما كبرتش فيها؟؟

ولا ليك صورة ع الرمل دامت ع الشط بمعانيها؟؟

دور جواك تلقاها هى الصحبة و هى الأهل

عشرة بلدى بتبقى نسيانها ع البال مش سهل

يمكن ناسى لإنك فيها

مش واحشاك و لا غيبت عليها

بس اللى مجرب و فارقها قال فى الدنيا ما فيش بعديها

إن غبت بحنلها و أنسى الدنيا و أجيلها

و إن جيت أنسى تفكرنا بمليون ذكرى القلب شايلها

غالية بلدنا علينا و ها تفضل فى عنينا

و مدام بنحب بلدنا تبقى ها تتغير بإيدنا

إحنا اللى نعليها بإيدينا نخليها

أجمل لينا و لولادنا مهما العمر يعدى عليها

....................................................................


والله كنت حاطة لينك للاغنية بس مش شغال للاسف

اللي يعرف يجيب اللينك بتاعها يبقي ميرسي اوي

تحفة طبعا جمدة جدا

معلش بس انا كنت سمعت الأغنية قبل كده بغض النظر عن لحنها الردئ فانا حاسس ان الكلمات مصطنعة وسطحية متألفة مخصوص عشان الظروف السياسية اللى كانت بتمر بيها البلد فى الفترة اللى نزلت فيها

اولا انا ميهمنيش اللحن اصلا ولا حتي بيهمني مين اللي بيغني والكلام دة خالص
انا كل اللي عجبني في الاغنية دي هي الاحساس اللي جالي وانا بقرا كلماتها وبسمعها فعلا كلمات حلووووة جدا ومؤثرة وتخليك تقف تفكر عند كل كلمة شوية
( ممكن اقولك اللي الاحساس اللي وصلي والكلمات دي جميلة ازاي لو انت مش مصدق كلامي )

بجد سيبك من النقد اللي انت سمعتة دة وركز في معانيها كدة .. متهيالي ممكن تغير رايك
وبعدين حكاية انها متالفة عشان الظروف اللي البلد فيها ..... طيب واية يعني ؟؟؟ مش فيها حاجة خالص انهم يالفو اغنية مخصوص عشان ظروف البلد واهلها عشان يحسسوهم بجمال مصر و يفكروهم بيها و يدوهم امل شوية ويساعدوهم انهم يستحملو الظروف دي لحد ما تعدي
بالعكس بقي كلامك دة يؤكد انها مش مجرد حد حب يغني لمصر عشان الناس تحبة فقام مالف كام كلمة ولحنها وقالها للناس عن مصر وخلاص زي اي اغنية كدة
لكن دي كدة لسبب وهدف معين زي ما بتقول انت وعشان كدة عمرها ما تكون مصطنعة ابدا لانها نابعة باحساس عالي منهم للشعب ( دة علي كلامك )
بس دة رايك انت حر فية طبعاااا مقدرش اتكلم ... انا بس حبيت اعرض انا لية عجباني الاغنية وكلماتها لحسن انت حسستني اني قريبة شيرين
بس برضو دة رايي ممكن مش هيعجبك لكن انا مقتنعة به
وعجباني الاغنية اوي وخصوصا كلماتها ومش انا بس لا عاجبة ناس كتير لانها عملت قلبان جامد والا مكنتش دققت فيها اوي كدة لاني مش متابعة جيدة للاغاني من اصلة

أولا أنا قلت " بغض النظر عن اللحن" عشان مايبانش انه سبب انتقادى للأغنية
ثانيا لو هانقد "كلمات" الأغنية حق ربنا هكره مؤلفها نفسه فيها لأن أولا كلماتها مش موزونة وكفاية أوى أول مقطع يحسسنى ان طفل اللى كاتب الكلمات و ودنه مش عارفة تظبط وزن الشعر، ثانيا قارنى كلمات الأغنية دى بأغنية "سلامات يا حبايب" ودى أغنية قديمة لمحرم فؤاد انا مابحبوش قوى بس بحب الشاعر اللى كتبها " مرسي جميل عزيز" هى أغنية طويلة بس بصى الكوبليه ده لوحده:
عديت بــــحر الليالى ونزلت ميت مـديـنــــة
لقيت الشـوق لبلدى سابقنى فى كل مينا
سافرت بلاد بعاد وبلاد غير البلاد
وقلبى هو ه هوه مش قادر عالبعاد
يا غربة دوبيني يا إما ترجعينى
وتروحيني بلدى
أنام فى حضن بلدى
وأقول لأهل بلدى
سلامات سلمات يا بلدى
سلامات يا حضن بلدى
سلامات يا أهل بلدى يا حبايب سلامات

غير برضه ان اللحن اسطورى للملحن الكبير بليغ حمدى
هابقى قريب انزل كلماتها كاملة واعملها Upload

طبعاغ الكوبلية اللي انت كاتبة كلماتة راااائعة بجد و حلوووووو اوي فعلا

بس برضو دة ميمنعش ان الاغنية دي كلماتها عجباني جدا و برضو مش انا لوحدي
وانا مقلتش حاجة علي كلامك انا بس عرضت رايي في نقدك لكلمات الاغنية بس مش اكتر

و " لولا اختلاف الاذواق لبارت السلع " اكيد كل حد له رايه وذوقة ومقتنع به ومريحة

ومنتظرين كلمات الاغنية اللي انت قلت عليها

بعد الجدل العظيم الرهيب الذي حدث بين أحمدوس السكروت المولود و كريزا المساعد الاستاذ قررت ان استخرج من الناس الاراء بخصوص هذه الاغنية ولم أجد من يعارض أنها من أجمل ماقيل في مصر وبمعنى الكلمة لم أجد فأعتذر لأحمدوس ...................

ولكن يا كريزا ليها حق الاغنية تعلق معاك مش يوم ولا يومين لا تعلق معاك سنين وسنين على رأي شرين