1- الهدية

موضوع: 1- الهدية الأربعاء فبراير 06, 2008 4:11 pm

"خد كلم فتحي صاحبك "
ده اللي سمعته و أنا نايم و لقيت أخويا الكبير بيديني الموبايل بتاعي على السرير و قلت و أنا لسه نايم و جزء بس من عقلي هو اللي بيتفاعل مع المكالمة : " أيوة يا فتحي "
سمعت صوته بيقولي بأسلوبه المعهود اللي بيحب يستخدم فيه الانجليزي أكتر من العربي : " سيربنت ازيك يا واد ؟؟"
-"تمام الحمد لله و انت ؟؟"
-"كوول يا مان بأقولك محتاجك في خدمة "
-"اؤمر "
-"مش هاتنفع في التليفون , ينفع أجيلك بكرة في الكلية ؟؟"
-"خلاص ماشي أنا هأخلص سيكشن الساعة 10 و فاضي لحد 12 "
-"بيس سي يو تومورو "
و رجعت للنوم وكأن المكالمة لم تكن
*********************

تاني يوم صحيت و رحت الكلية و أنا شاكك أصلاً في اني كلمت فتحي ولا ده كان جزء من الحلم بس على الساعة 9 و نص لقيته بيتصل و بيقولي انه في الكلية و كنت أنا خلصت سيكشنس فقابلته و بعد السلامات المعروفة قلتله :
-"ايه الخدمة بقى اللي مش هتنفع في التليفون ؟؟"
قالي و بابتسامه مخيفة :"جمجمة"
مفهمتش فبصتله باستغراب و سألته " عايز تشوف جمجمة ؟"
قالي " لأ عايز أشتري جمجمة ؟؟"
رديت عليه و أنا دهشتي بتزيد : "ليه ان شاء الله ؟؟ نويت تدرس طب ؟؟"
ضحك و كأني قلتله نكتة القرن و قالي :" لأ طبعاً أنا لسه ماتجننتش , دي هدية لصاحبي في عيد ميلاده "
اتهيألي ساعتها اني فهمت و قلت في بساطة العالم ببواطن الأمور و خباياها : " و هو في طب ولا أسنان ؟؟"
قالي و ضحكته بتزيد : "لأ معايا في هندسة "
وقفت عن المشي ساعتها و قلتله : " مش فاهم طب هو عايزها ليه بدام في هندسة ؟؟"
قالي و هو بيشدني عشان نكمل مشيّ :"أنا أفهمك بقى يا سيدي الواد ده اتحداني اني أجيبله هدية تخوفه و أنا قبلت التحدي ففكرت اني هأعمله عيد ميلاد عمره ماينساه و أجيبله جمجمة هدية عايز أشوف تعبير وشه و هو بيفتحها"
-"طب ما تجيبهاله بلاستيك ؟؟"
-"مينفعش الو.....قصدي عشان يخاف لازم تكون حقيقية "
-"هو ده السبب الحقيقي ولا انت مخبي عليا حاجة ؟؟"
-"عيب عليك و أنا أخبي عليك انت يا سيربنت ,ده انت أعز أصحابي "
-"على الرغم من اعتراضي على المبدأ عشان الهياكل العظمية بتاعت الأموات مش لعبة بس مقدرش أردلك طلب "
رحنا سوا المشرحة و أقنعنا العامل ان فتحي من طلبة طب أسنان و محتاج جمجمة عشان يدرس عليها و طبعاً العامل كأي مصاص دماء قصدي أموال بيحترم نفسه استغل الفرصة و باعهاله بسعر مضاعف و كمان صاحبي من الكلية عدوي كان بيشتري هيكل منه ساعتها فالعامل طلعله بمبلغ جامد و افتكرت ان القصة انتهت عند كده بس مكنتش أعرف ساعتها ان دي مجرد تجهيزات للبداية و اني مغفل كبير و هأدفع التمن......
***********

زائر

وما هو الثمن
شؤال يطرح ذاته

زائر

وما هو الثمن
شؤال يطرح ذاته

موضوع: رد: 1- الهدية الأربعاء فبراير 06, 2008 6:39 pm

على فكرة القصة واخدها من أحداث حقيقية حصلتلي
و هأكتب بقيتها بس لو لقيتها عجبت الناس

نسيت كل حاجة تقريباً عن الموضوع بعد ما أخدتها مادة للتندر عن جنوني أنا و أصحابي و ساديتنا على الرغم من اننا مش كده بس بنحب نتظاهر بكده مش حباً في السادية ولا حباً فيها انما عشان بيعجبنا ان الانسان يقدر يسيطر على مشاعره و يقتلها تماماً بل و يتظاهر بعكسها زي بالظبط واحد صاحبي كان معجب جداً بجيفارا مش اقتناعاً بمبادئه ولا حاجة انما اعجاباً بالشخصية نفسها
بعديها بحوالي أسبوع و قبل امتحانات نص السنة بأسبوع و أنا قاعد بالليل على النت و عامل نفسي أوفلاين على الماسنجر لقيت فتحي داخل على النت و مسمي نفسه نيكرومانسر استغربت شوية لانه مش من أساميه المعتادة لكن قلت مفرقتش نيكرومانسر من ديفيل أو لوسيفر كلها أسامي رنينها مخيف و مناسبة لفتحي و بدأت شات معاه
-"ازيك يا نيكرو ؟؟"
-"تمام جهزت الحاجة ؟؟"
مفهمتش بس قلت أجاريه في هزاره لاني عارفه كويس
-"أه طبعاً كله جاهز"
-"أنا معايا الجمجمة"
-"عارف و أنا كمان معايا واحدة "
-"ازاي ؟؟"
-"ازاي ايه ؟؟ عمرك ما شفت واحد في طب معاه جمجمة بيذاكر عليها ؟؟"
-"طب ؟؟!! سيربنننننننت "
-"أيوة طبعاً اعمل نفسك مش عارفني ياللا"
-"انت عارفني يا سيربنت مليش أوي في النت "
-"يلا مش مشكلة"
-"بعد اذنك هامشي أنا دلوقتي . سلام"
************
كانت كل حاجة بتحاول تفهمني بس كنت غافل تماماً
************

بعد الامتحانات ما خلصت رجعت البيت و كعادتي اتصلت بفتحي بصفته أقرب صديق ليا عشان نخرج سوا لكن فوجئت بصوته مهزوز تماماً غير مانا عرفته مش هو ده فتحي صاحبي
بقى متوتر و عصبي جداً لكن بغبائي افتكرته بسبب كليته أو ضغط والده عليه و قلت أبقى اتصل أطمن عليه بعد كام يوم
************

زائر

ايه يا عم الرعب دا وبعدين عاوزين الجزء اللي جاي يكون سمين شويه انت بتنقطنا ولا ايه؟؟؟؟
بس جامده أنا عجبتني أوي الحته اللي غلط فيها وهو بيكلمك دي

موضوع: رد: 1- الهدية الأربعاء فبراير 06, 2008 9:20 pm

اسرع اسرع
اسرع اسرع

مش هاينفع كده
زود سرعتك شويه

موضوع: رد: 1- الهدية الأربعاء فبراير 06, 2008 9:37 pm

يا جماعة الأحداث الحقيقية لسه مش تمت تماماً
فعشان كده اصبروا لاني باجمع ما بين الحقيقة و خيالي خاصة ان مش كل الأحداث أنا حضرتها
انما باجمعها زي نسخ شريط ال DNA العكسي

ياعيني ياعيني dna وكمان بطريقة عكسية

ربنا يسهل

موضوع: 3- الجاثوم الأربعاء فبراير 06, 2008 11:46 pm

بدأت الأجازة و كالعادة قبلها باحط خطط كتير و بيتهيألي اني ممكن أطلع القمر ذات نفسه في الأجازة و أول ما تبدأ ملقيش حاجة اعملها......
و في أول أسبوع من الأجازة أو بدقة في أول يومين و أنا نايم بالليل حسيت تقل غريب على ضهري لاني ساعتها كنت نايم على بطني و ابتديت أحس اني باتخنق قعدت أحاول أتعدل لكن حسيت كأن حد قاعد على ضهري و بعد عدة محاولات نجحت اني اتعدل و قعد على السرير لكن فوجئت بشيء مرعب في الضلمة اللي أنا نايم فيها
كائن غريب مشوه شبه الشياطين اللي منحوتة على الكنيسة بتاعت فيلم أحدب نوتردام قصير و له جناحات و في الضلمة باين ان ليه ودانين طوال زي بتوع الجن في فيلم لورد أوف رينجز
و سمعت صوته بيقول :
-"سيدي بيحزرك يا تصلح اللي عملتوه يا اما تلحق بزملائك"
و اختفى قبل ما ادرك ان كان حقيقة ولا خيال و لما فقت و استعدت ادراكي للي حوليا كان كل حاجة طبيعية و سمعت أدان الفجر بيأذن بصوت دافي و مريح نفسياً...
أنا عارف الهلاوس البصرية السخيفة دي اللي بتجيلي واضح اني لازم أبطل قراية قصص ما وراء الطبيعة اللي بتزود خيالي دي و ابطل اتعشا و كمان اتفرج على أفلام رعب و اني أفكر في درجات الامتحان...ببساطة أبطل أكون أنا
*********

اليوم اللي بعده اتكرر نفس الكابوس بحذافيره و بردو الليلة التالتة لدرجة اني افتكرت أسطورة أخر الليل بتاعت ما وراء الطبيعة لاني عرفت منها ان الجاثوم ده هو خادم النيكرومانسر اللي بيبعته عشان يقتل أعدائه و هم نايمين بالليل بس في القصة كان البطل أجداده نيكرومانسر أي نعم أجدادي أتراك زي أجداد البطل بس ماظنش في تاريخ عيلتنا جت سيرة النيكرومانسر دول المهم في اليوم ده اتصلت بفتحي أطمن عليه و ردت عليا والدته بصوتها الرصين بس ادهشتني رنة الحزن اللي في صوتها و لما سألتها عن فتحي قالتلي في صوت أشك على البكاء :
-"فتحي جاله انهيار عصبي"
-"امتى الكلام ده و ازاي ؟؟"
-"من يومين صحينا قبل الفجر على صرخة رهيبة منه و لما دخلنا أوضته لقيناه مرمي على وشه و أخدناه بسرعة على المستشفى الدكتور قالنا انه مصاب بانهيار عصبي و اغمى عليه بسببها و من ساعتها و هو محجوز في المستشفى "
أخدت منها عنوان المستشفى و رحت زرته لقيت وشه مصفر على الرغم من بدانته و لما شافني اتعدل في سريره بسرعة و قال ليا في لهجة انسان أوشك على الجنون :
-"سيربنت........الجمجمة......هيجيلك في ساعة الذئب....مش هيسيبك زي ما عمل معانا...أرجوك سامحني"

موضوع: 4-اللغز الجمعة فبراير 08, 2008 1:54 am

تردد كلام فتحي جوايا و الممرضين و الدكتور المسؤول بيرجعوه لسريره و بيحقنوه بمهديء و أنا باتابع ده كله و أنا شارد الذهن و بأفكر في كلام فتحي لانه أيقظ فيا ابشع الشكوك و الظنون
و بعد ما الدكتور خلص سألته عن حالته قال ليا :
-"هو جاله انهيار عصبي حاد نتيجة لحاجة شافها أو خبر سمعه و بسبب وزنه الزايد قوي كان عنده مشاكل في القلب فجاتله نوبة قلبية و اغمى عليه بس الحمد لله لحقنا الحالة "
و دخلت الأوضة لقيت دنيا أخت فتحي الكبيرة قاعدة و بتعيط فقعدت سلمت عليها و قعدت أواسيها شوية و أطمنها على حالة فتحي باعتبار اني بعد 5 سنين ممكن أبقى دكتور و الناس بتاخد كلامي ثقة باعتبار اني في طب و خلاص اكتسبت حكمة الحياة كلها و بعدها دخلت في الموضوع مباشرة و سألتها انها تحكيلي بكل التفاصيل ايه اللي حصل بالظبط فقالتلي :
-"كله بدأ من ساعة ما فتحي بدأ يدخل على موقع غريب عرفت بعد كده انه موقع ليه علاقة بالسحر الأسود و بدأ من ساعتها يتغير حاجات بسيطة بس عادي انت عارفه انه ساعات بيحب يعمل حاجات غريبة بس تقليد سطحي من غير ما يتعمق و بعديها رجع البيت مرة و معاه شنطة سودة و كأن جواها كورة بس قالي لما دخل أوضته انها جمجمة جايبها هدية ليك عشان تذاكر عليها و طلب مني اني أخلي الموضوع سر عشان بابا و ماما أكيد مش هيرضوا "
افتكرت طبعاً اليوم ده و افتكرت اصرار فتحي ان العامل مينشرش الجمجمة و يسيب الكاب متصل بالجمجمة و طبعاً العامل استغرب و اعترض بس 10 جنيه في الايد خلته يوافق بس طبعاً مقلتش لدنيا الكلام ده كله و سبتها تكمل
-"بعديها بيوم راح يبات مع اتنين من أصحابه عشان عندهم مشروع للكلية في بيت واحد فيهم أهله مسافرين و اخد الجمجمة معاه عشان يفرجهالهم لن رجع تاني يوم و وشه مصفر و متوتر جداً و مش مركز و دخل اوضته و نام على طول "
سألتها : "أمال جاله الانهيار ده من ايه ؟؟ "
قالتلي :"ما هو لما بعدها بكام يوم جاله خبر ان أصحابه الاتنين اللي سابهم في الشقة سوا ماتوا و هم بايتين مع بعض و الدكتور قال انه ممكن يكون تسمم غذائي بأكل ملوث بنيترات الصوديوم عشان كانوا ميتين مزرقين و كمان مكنش فيه شبهه جنائية ساعتها قال الدور عليا , أنا الجاي و هديناه بالعافية و ليلتها حصل اللي حصل سمعناه بيصرخ قبل الفجر بساعة دخلنا عليه لقيناه مغمى عليه و واقع على وشه جبناه المستشفى الخاص دي "
و قامت صبت لنفسها كوباية مياه من القارورة الموجودة في شمال الأوضة من النوع الموجود في كل الأماكن العامة دي و أنا ساعتها كنت ابتديت أجمع فكرة عن الموضوع
سألتها و أنا لسه بافكر و عينايا بتبص في اللا مكان :
-"طب أحمد مقالش أي كلام اعتبرتوه هلوسة و هو مغمى عليه ؟؟"
فكرت شوية و قالتلي :
-"يعني كلام بسيط....النيكرومانسر.....الجمجمة هي السبب......الجاثوم....ساعة الذئب"
و اتحققت مخاوفي........
********

-"طب ما تجيبهاله بلاستيك ؟؟"
-"مينفعش الو.....قصدي عشان يخاف لازم تكون حقيقية "
********

-"ازيك يا نيكرو ؟؟"
-"تمام جهزت الحاجة ؟؟"
مفهمتش بس قلت أجاريه في هزاره لاني عارفه كويس
-"أه طبعاً كله جاهز"
-"أنا معايا الجمجمة"
*********

-"سيربنت........الجمجمة......هيجيلك في ساعة الذئب....مس هيسيبك زي ما عمل معانا...أرجوك سامحني"
*********

-"سيدي بيحزرك يا تصلح اللي عملتوه يا اما تلحق بزملائك"
*********

نيكرومانسر كلمة لاتينية متكونة من مقطعين نيكرو بمعنى الموتى و مانسر و هو المستجوب على بعضها يعني مستجوب الموتى و هي مشتقة من النيكرومانسي أو استجواب الموتى و هو نوع من السحر الأسود الخاص بالمغول تقريباً و فيه من خلال بعض الطقوس و التعاويذ بيقوم النيكرومانسر باستجواب الميت و ياخد اللي بيعرفه عن طريق انه يأكل أجزاء منه على سبيل المثال لما يأكل عينه يعرف كل اللي شافه و ودنه كل اللي سمعه و هكذا فلك أن تتخيل كم المعرفة و العلم اللي بيحصل عليها من خلال وظيفته المقيته دي فهو ممكن يحصل على العلم و أسراره من العلماء و أماكن الكنوز و هكذا....
أما الجاثوم فهو كائن شيطاني مشوه وصفته قبل كده و هو الخادم المخلص للنيكرومانسر اللي بيقتله أعدائه و هم نايمين عن طريق انه يقعد على ظهرهم و هم نايمين فيخنقهم و ميخليهمش يعرفوا يتنفسوا و على فكرة مرسوم في بعض الألواح الأوروبية القديمة انه شيطان أسود قصير ليه جناحين و ودانين طوال و أنف حاد و جاثم فوق صدر حد نايم و من هنا جيه اسمه انه بيجثم فوق الصدر و كمان بيجيب الجثث للنيكرومانسر عشان يستجوبها
و ساعة الذئب فهي الساعة اللي بيهاجم فيها الجاثوم ضحاياه و هي قبل الفجر بساعة الساعة اللي بتحصل فيها النوبات القلبية و حالات الموت المفاجيء و الولادة بردو لأسباب طبية...بمعنى تاني أضعف ساعات الانسان زي ما افتكروها زمان.....
*********

كده القصة ابتدت توضح و بخيالي أقدر أرسم صورة شبه كاملة...
فتحي و هو قاعد على النت يلاقي موقع عن السحر الأسود أو حد يقول له عليه و يلاقي فيه التعويذة و الطقوس بتاعت تحضير النيكرومانسر و من ضمنها الجمجمة و يتفق هو و اتنين من اصحابه على تحضيره و تنجح التعويذة بس لقلة خبرتهم فيخرج النيكرومانسر عن سيطرتهم و يبدأ يقتلهم بس فتحي نجى منه و هو دلوقتي بيسعى ورايا ليه ؟ عشان أنا ساعدتهم في انهم يشتروا الجمجمة رغم اني كنت حاسس ان فيه حاجة غلط
لو القصة كده ليه بيقتلهم مع انهم اللي رجعوه ؟؟؟!! و اشمعنى فتحي مقتلوش ؟؟؟
و ازاي أخلص من الكابوس ده؟؟ أسئلة كتير محدش هيجاوبني عليها غير فتحي و طبعاً ده مستحيل في حالته الحالية
هاعمل ايه ؟؟ لغز و ملهوش حل حالياً
واضح ان أجازتي مش هتكون هادية زي ما توقعت
*********

موضوع: 5-الهاكر الأربعاء فبراير 13, 2008 8:18 pm

رجعت البيت يومها و بالي مشغول جداً و باحاول أرتب الحقايق في دماغي و كانت كالتالي ان فيه نيكرومانسر في مصر و دي في حد ذاتها حاجة غريبة جداً أقرب للخيال منها للواقع و تاني حاجة انه بيسعى ورايا أنا حالياً و ده شيء رائع لانه شعور جميل ان في حد بيهتم بيك لدرجة انه عايز يقتلك بجد لازم تجربوا الشعور ده و زي ما هو واضح ان النيكرومانسر بيقتل عن طريق الجاثوم كعادته
الطبيب قال ان موت أصحاب فتحي كان بسبب تسمم طعام لان مفيش شبهه جنائية في الموضوع و أكيد ملقاش على رقبتهم أي علامات للخنق لكن أنا متأكد ان الجاثوم هو اللي قتلهم و اراهن ان الطبيب لو كان بص على ضهرهم كان هيلاقي و بكل وضوح علامات مكان ما قعد على ضهرهم و خنقهم
يبقى مشكلتي الحالية مع الجاثوم و دي حلها بسيط لانه بيهاجم في ساعة معينة و لما يكون الانسان نايم فيبقى ببساطة لازم أكون صاحي في الوقت ده و الحمد لله اني في الأجازة لان سهل اني اظبط المنبه و أصحى قبل الفجر بساعة و شوية قبل ميعاد هجومه أما لو كنت في الدراسة كان مستحيل اتجنبه
و أخر حاجة اني لازم أدور على وسيلة اقضي بيها على النيكرومانسر عشان انقذ رقبتي منه و ده للأسف كل اللي قدرت اجمعه من معلومات أه بس لو الاقي طريقة أعرف بيها اللي حصل بالظبط و على أساسه أعرف اتصرف ازاي.
عامة لازم أنام بدري عشان هاصحى بدري أكتر من اللازم
************

تاني يوم صحيت قبل الفجر و الحمد لله مهاجمنيش الجاثوم زي ما توقعت و الصبح بدري ركبت و رحت أزور فتحي في المستشفى الخاص و صراحة كان مشوار متعب عشان المستشفى في المقطم و لما وصلت فوجئت انهم حطوا جهاز صاعق القلب جنب سرير فتحي و كان في حالة من التوتر و لما سألت الممرضة قالتلي :
-"جتله نوبة قلبية تاني بالليل و ان الممرضة اللي كانت بايتة في المستشفى لقت لوحة المتابعة بتدي الانذار بتاعها لما واحد من المرضى بتوع النوب القلبية تبدأ تجيلهم النوبة و لما راحت تشوفه و استدعت الدكتور اتهيأ لها ان في كائن أسود قاعد على ضهر زميلك اللي منعرفش لحد دلوقتي ازاي اتقلب و نام على بطنه و هو متوصل بأجهزة رسم القلب و غيرها و لما صرخت اختفى و اتهيألها انها بتهلوس خاصة ان الأمن فتشوا الدور التاني اللي فيه أوضة فتحي كله و ملقوش حاجة بس الدكتور لحق زميلك و قرر انه يحط الجهاز في أوضته بحيث انه أول ما يحتاج نلحق نسعفه "
كلامها شدني فسألتها : " و حصل امتى الكلام ده ؟؟"
-"ماعرفش امتى بالظبط بس عامة كل المعلومات هتلاقيها على كمبيوتر المستشفى "
رددت : - " كل المعلومات هالاقيها على الكمبيوتر ؟؟!!"
قالتلي :
-"أه " و ابتدت تشرحلي في حماس مكان مكتب الكمبيوتر في المستشفى لكن في الواقع بالي كان مشغول بحاجة تانية خالص لان الممرضة من غير قصد اديتني الحل
*************
"كله بدأ من ساعة ما فتحي بدأ يدخل على موقع غريب عرفت بعد كده انه موقع ليه علاقة بالسحر الأسود"
*************

و لما راجعت البيانات في كمبيوتر المستشفى اتأكدت مخاوفي لان النوبة جت لفتحي قبل الفجر بساعة و ده معناه حاجة واحدة ان الجاثوم ابتدى يسعى وراه تاني و المرة دي أكيد مش هيسيبه حي و معنى كده ان أياً كانت الظروف لازم اتوصل لطريقة و انفذها قبل النهاردة بالليل
*************

فتحي كان مدمن كمبيوتر و مستواه في الهاردوير و السوفت وير رائع لكن مشكلته انه مهارته في النت عادية و كنا كده بنكمل بعضنا زي أي حاجة تانية في الحياة
أنا عليا النت و هو الكمبيوتر ذات نفسه , أنا اللسان و الى حد ما العقل و هو الجسم و تكملة عقلي حتى لما كنا مع بعض في ثانوي فكنت أنا باتولى أي شق ليه علاقة بالجدال و الكلام و الدفاع عننا ضد الأساتذة أما هو فكان متولي شق الخناقات و الضرب بجسمه الهائل - بسم الله ما شاء الله عليه- حتى انه في مرحلة من المراحل علمني شوية حركات جودو أدافع بيهم عن نفسي لانه بيعتمد على الأسس التشريحية لجسم الانسان أكتر منه على القوة البدنية.
و بالتالي فأي حاجة كان بيعملها على الكمبيوتر
روحت البيت بسرعة الهوا و فتحت برنامج هاكرز من البرامج اللي كنت باحتفظ بيها للطواريء و في حالات الدفاع عن جهازي بس و دخلت بيها على كمبيوتر فتحي اللي كنت حافظ الأي بي بتاعه و فتحت الميل بتاعه و فعلاً لقيت مجموعة ايميلات متبادلة بين أحمد و اتنين مسميين نفسهم نيكرومانسرز سيرفينتس أو خدم النيكرومانسر بالعربي و من حسن حظي انهم من الناس اللي مش بيمسحوا الايميل لما يعملوا ريبلاي عليه فعرفت حتى الايميلات اللي فتحي بعتها و عرفت منها ان واحد منهم هو اللي لقى موقع عن السحر الأسود و لقى فيه وصفة سحرية سهلة التحضير و بيقترح انهم ينفذوها و ايميل من فتحي ليه بيقوله انه جاب الجمجمة و التاني رد عليه و قاله ان التالت هيجيب باقي المتطلبات و اعذروني مش هاقولها لشدة اشمئزازي و يكفيكم انكم تعرفوا ان الجمجمة كانت اكتر حاجة بريئة و سهلة الاحضار مقارنة بالباقي و بعد كده ايميل بيحدد ميعاد التجمع لجلسة التحضير و في ايميل أخير كان واحد فيهم بيلوم فتحي لانه السبب في اللي حصل بسبب ان الجمجمة مكنتش متكاملة لان الفك السفلي كان مش بتاع الجمجمة نفسها و بسبب كده فهم مهددين دلوقتي
*************
و طبعاً العامل كأي مصاص دماء قصدي أموال بيحترم نفسه استغل الفرصة و باعهاله بسعر مضاعف و كمان صاحبي من الكلية عدوي كان بيشتري هيكل منه ساعتها فالعامل طلعله بمبلغ جامد
*************

دخلت على الموقع من ذاكرة النت و لقيت انه موقع شيطاني بشع بيتكلم عن عودة الشيطان للعالم و فيه وصفات سحرية كتير و الظريف ان الأعضاء بيردوا بعدها انها وصفة ممتازة و انهم جربوها و النتايج متتوصفش ( ولا كأنهم بيتكلموا عن وصفة أكل ) و لما دخلت على الوصفة اللي فتحي فتحها لقيت السكريبت بيقول :
" لمحة من الماضي
عرف الحاضر و المستقبل من بعده بفن من فنون الماضي و جبلهم نيكرومانسر يقاتلهم بالجاثوم و يكشف أسرار موتاهم....."و سخافات كتيرة أوي و بعد كده الوصفة
و طبعاً بعد ما خلصت الموضوع و فشلت اني ألاقي طريقة للقضاء على الجاثوم هاجمت المنتدى ده ببرنامج تاني من برامج القرصنة عن طريق انه يبعت رسايل كتير جداً في نفس الوقت لدرجة ان الخادم بتاع الموقع ميقدرش يتابع فيقع و فعلاً نجحت و خلال كده كنت باحضر جوايا خطة المواجهة الأخيرة مع النيكرومانسر
************

فتحي كان مدمن كمبيوتر و مستواه في الهاردوير و السوفت وير رائع لكن مشكلته انه مهارته في النت عادية و كنا كده بنكمل بعضنا زي أي حاجة تانية في الحياة
أنا عليا النت و هو الكمبيوتر ذات نفسه , أنا اللسان و الى حد ما العقل و هو الجسم و تكملة عقلي حتى لما كنا مع بعض في ثانوي فكنت أنا باتولى أي شق ليه علاقة بالجدال و الكلام و الدفاع عننا ضد الأساتذة أما هو فكان متولي شق الخناقات و الضرب بجسمه الهائل - بسم الله ما شاء الله عليه- حتى انه في مرحلة من المراحل علمني شوية حركات جودو أدافع بيهم عن نفسي لانه بيعتمد على الأسس التشريحية لجسم الانسان أكتر منه على القوة البدنية.
و بالتالي فأي حاجة كان بيعملها على الكمبيوتر
روحت البيت بسرعة الهوا و فتحت برنامج هاكرز من البرامج اللي كنت باحتفظ بيها للطواريء و في حالات الدفاع عن جهازي بس و دخلت بيها على كمبيوتر فتحي اللي كنت حافظ الأي بي بتاعه و فتحت الميل بتاعه و فعلاً لقيت مجموعة ايميلات متبادلة بين أحمد و اتنين مسميين نفسهم نيكرومانسرز سيرفينتس أو خدم النيكرومانسر بالعربي و من حسن حظي انهم من الناس اللي مش بيمسحوا الايميل لما يعملوا ريبلاي عليه فعرفت حتى الايميلات اللي فتحي بعتها و عرفت منها ان واحد منهم هو اللي لقى موقع عن السحر الأسود و لقى فيه وصفة سحرية سهلة التحضير و بيقترح انهم ينفذوها و ايميل من فتحي ليه بيقوله انه جاب الجمجمة و التاني رد عليه و قاله ان التالت هيجيب باقي المتطلبات و اعذروني مش هاقولها لشدة اشمئزازي و يكفيكم انكم تعرفوا ان الجمجمة كانت اكتر حاجة بريئة و سهلة الاحضار مقارنة بالباقي و بعد كده ايميل بيحدد ميعاد التجمع لجلسة التحضير و في ايميل أخير كان واحد فيهم بيلوم فتحي لانه السبب في اللي حصل بسبب ان الجمجمة مكنتش متكاملة لان الفك السفلي كان مش بتاع الجمجمة نفسها و بسبب كده فهم مهددين دلوقتي
*************
و طبعاً العامل كأي مصاص دماء قصدي أموال بيحترم نفسه استغل الفرصة و باعهاله بسعر مضاعف و كمان صاحبي من الكلية عدوي كان بيشتري هيكل منه ساعتها فالعامل طلعله بمبلغ جامد
*************

دخلت على الموقع من ذاكرة النت و لقيت انه موقع شيطاني بشع بيتكلم عن عودة الشيطان للعالم و فيه وصفات سحرية كتير و الظريف ان الأعضاء بيردوا بعدها انها وصفة ممتازة و انهم جربوها و النتايج متتوصفش ( ولا كأنهم بيتكلموا عن وصفة أكل ) و لما دخلت على الوصفة اللي فتحي فتحها لقيت السكريبت بيقول :
" لمحة من الماضي
عرف الحاضر و المستقبل من بعده بفن من فنون الماضي و جبلهم نيكرومانسر يقاتلهم بالجاثوم و يكشف أسرار موتاهم....."و سخافات كتيرة أوي و بعد كده الوصفة
و طبعاً بعد ما خلصت الموضوع و فشلت اني ألاقي طريقة للقضاء على الجاثوم هاجمت المنتدى ده ببرنامج تاني من برامج القرصنة عن طريق انه يبعت رسايل كتير جداً في نفس الوقت لدرجة ان الخادم بتاع الموقع ميقدرش يتابع فيقع عشان محدش يقدر يدخل عليه تاني و يحضر أي سحر أسود و فعلاً نجحت و خلال كده كنت باحضر جوايا خطة المواجهة الأخيرة مع النيكرومانسر
************

زي ما عرفت ان المشكلة ان الفك بتاع الجمجمة مش موجود و افتكرت ساعتها لما عدوي كان بيشتري معانا هيكل يومها سألت نفسي ليه ميكونش الفكين اتبدلوا مع بعض بالغلط
و الحل اني أجيب الجمجمة بتاعت فتحي و الفك من عند عدوي
استأذنت من بابا و قلتله اني رايح لعدوي صاحبي و وافق ليا باعتبار اني في أجازة و فاضي لكن واضح ان الموضوع ده خلاني أعمل حاجات كتير غلط : هاكر على كمبيوتر اعز أصحابي و كذب على بابا و ماما و لسه ياما نشوف بس أظن الضرورات تبيح المحظورات
و بدل ما أروح بيت عدوي على طول رحت لبيت فتحي الأول بحجة اني ارجع قصص كنت مستلفها منه و كنت ساعتها بافكر في طريقة أدخل بيها أوضته و أخد منها الجمجمة لكن فوجئت بأخته دنيا جايباهالي حتى قبل ما اطلب أدخل الأوضة و قالتلي:
-"فتحي كان جايبهالك هدية و كان نفسه يديهالك و بما انك جيت فخدها "
كانت مفاجأة لكن ساعتها حسيت ان القدر بيلعب لصالحي و بيدفعني دفعاً عشان أقضي على النيكرومانسر.
بعديها طلعت على بيت عدوي و استقبلني بكرم كعادته و كنت رايح بحجة اني قلت أعدي عليه عشان نرتب مفاجأة لعيد ميلاد واحد صاجحبنا و دخلت أوضته و لقيته من الناس اللي بيحطوا الجمجمة على المكتب و كأنه بيعلن للجميع انه طالب طب و ان الموت و الهياكل العظمية أصبحوا زملاء عمل و اتكلمنا شوية و انتهزت فرصة انه قام يحضرلنا عصير و بدلت الفكين بسرعة البرق و قعدت و براءة الأطفال على وشي.....
**********

بالليل خرجت من البيت بحجة اني هابات عند واحد من أصحابي في الكلية عشان نحضر بحث الأناتومي المطلوب مننا و كنت متوقع ان أهلي هيرفضوا و ده طبعهم لكن لدهشتي لقيتهم وافقوا و خاصة لما لقوني واخد جمجمة معايا و ماما قعدت تدعيلي بالتوفيق و كان ساعتها ليلة ماتش مصر مع كوت دي فوار في قبل نهائي كأس الأمم الأفريقية الشوارع كانت تقريباً فاضية و وصلت للمستشفى اللي في المقطم و ملقيتش أي حراسة عليها كلهم متجمعين في أوضة الأمن من السقعة و قاعدين يتفرجوا على الماتش و الجميل في المقطم انه تحس انه منعزل عن القاهرة تماماً هادي جداً و الجو فيه حتى مختلف
فكان في القاهرة سقعة أما في المقطم فكان تلج و مطر رهيب باختصار كانت ليلة مناسبة جداً لمهمة زي اللي أنا باسعى ليها و وصلت لأوضة أحمد و خبيت الجمجمة فيها و وقفت شوية أبص عليه و هو نايم و قلتله :
-"عارف اني ياما حذرتك من انك بتغامر و بتجرب حاجات ممكن توديك في داهية و ادي كلامي اتحقق بس أوعدك اني هاحميك المرة دي و لو كلفتني حياتي نفسها يا صديق العمر "
و استخبيت في أوضته و استنيت هجوم الجاثوم في هدوء تام و أنا باراجع جوايا الخطة للمرة الألف و كل مرة كنت باتأكد انها خطة ساذجة جداً و أكيد هتفشل
***********

فجأة سمعت صوت خطواته و بصيت في ساعتي لقيتها قربت من 4 بعد نص الليل صوت الخطوات بتقرب قوي و كأنه خلاص بقى فوقي و شوية و الخطوات وقفت و حسيت ان السرير بينزل زيادة فاتسحبت من تحت سرير فتحي مكان ما كنت مستخبي و لمحته.....
كان كائن أسود قاعد على صدر فتحي ....فخرجت و قلت :
-"غريبة يعني مش قاعد على ضهره ليه المرة دي "
و قبل ما أكمل عبارتي كان طار للسقف و وقف في ركن السقف بين الحيطة اللي ورا السرير و السقف و هو بيطلع صوت ممكن تعتبره فحيح أو زمجرةعامة اللي اتفرج على فيلم جيبرز كريبرز أكيد عارف الصوت ده اللي كأنه طالع من أعمق أعماق الجحيم
فقلتله في سخرية :-
"متقوليش اني خوفتك أي نعم أنا عارف اني شكلي بيخض العيال الصغيرة بس ميخوفش جاثوم زيك"
و مع ذلك ماهجمنيش و ابتدى يزحف على الحيطة زي ما جيه و كان رايح ناحية الحيطة اليمين للأوضة اللي هي عبارة عن واجهة زجاجية ضخمة و فوق خالص مجموعة من الشبابيك و واحد منهم مفتوح و طبعاً هو أكيد جه من ده...
قلت في أسف مصتنع : "يا خسارة واضح انك أجبن مما كنت متوقع"
"لكن أكيد مش هاسيبك ترجع لرئيسك فاشل كده. مش هو عايز دي بردو ؟؟"
ساعتها وقف و بص لقاني واقف على الناحية التانية من سرير فتحي و ماسك الجمجمة في ايدي راح زمجر مرة تانية و نط نظة رهيبة من مكانه أو بالأصح طار في فراغ الأوضة و نزل ورايا فلفيت حولين نفسي بأقصى سرعتي و أنا بارفع رجلي و أول ما لمحته دفعت رجلي في صدره بكل قوتي و شفته بيرجع ورا لحد ما خبط في الكولمن بتاع المياه الزجاجي فاتكسر و المياه غرقت الجاثوم و ابتدت تسيل على الأرض و في لحظتها نطيت على جهاز الصاعق بتاع ضربات القلب و شغلته من الزرار و مسكت الطرفين و حطيتهم في المياه و ابتدى جسم الجاثوم يتنفض و هو ثابت في مكانه و يتنفض و يتنفض
ماظنش ان في أي كائن حي يقدر يستحمل 3000 فولت مرة واحدة و لمدة 5 دقايق لحد ما ريحة شوي مقززة ابتدت تطلع فشيلت الطبين و خاصة ان المياه ابتدت تقرب مني و كانت هتوصل لرجلي
و ساعتها الجاثوم وقع و ابتدى يختفي بالتدريج زي في أفلام الرعب.....
و لأول مرة أحس اني انتصرت أخيراً و قلت بكل فرحتي و أنا باصص على الجاثوم اللي بيختفي : " و كده تنتهي المباراة بانتصار سيربنت على الجاثوم و النيكرومانسر "
لكن يافرحة ما تمت سمعت صوت من ورايا بيقولي :
-"ماظنش المباراة انتهت عشان نعلن انتصارك"
لفيت و اترفعت حواجبي لأخرها من الدهشة....
*********
لغاية اللحظة ديكانت خطتي في منتهى البساطة ان سلاح النيكرومانسر اللي بيقتل بيه هو الجاثوم و بالتالي لو اتخلصت من الجاثوم يبقى النيكرومانسر لا حول له ولا قوة
و على الأساس ده بنيت خطتي و أنا جاي و متأكده انه هيهاجم فتحي لكن اللي شفته لحظتها كان أخر حاجة اتوقعها...
-"ايه انت فقدت النطق ولا الجاثوم أكل لسانك قبل ما تقتله ؟؟!!"
كان واقف هناك عند الشباك تماماً زي ما شفته في الموقع
طويل و عريض و لابس عباية سودة طويلة و بشرته فاتحة أوي و شعره و دقنه طوال و ضيف لكده ان الدنيا من وراه بتمطر و البرق و الرعد شغالين فأضاف للمشهد طابع سينمائي رهيب
قلت بكل ذهول :
-"النيكرومانسر ؟؟!!"
رد و هو بينحني في طابع مسرحي ساخر :
-"أنا هو لكن للأسف مش بشحمه و لحمه لكن بمساعدتك هأقدر استرجعهم"
-"بس ازاي ؟؟!!"
-"بانك تديني الجمجمة بفكها السليم المرة دي و تخليني أكمل التعاويذ عشان أسترجع جسمي"
-"مش باسأل على كده انما باسأل ازاي جيت ؟؟"
-"عادي عن طريق التعويذة اللي صاحبك فتحي و أصحابه نفذوها و اللي في الأصل أنا كنت كتبتها في زمني و خبيتها على أمل ان حد في يوم من الأيام هيلاقيها و يجيبني من جديد و فعلاً حصل كده بعد ما فتحي صاحبك قرى عني و عن حياتي في كتاب اشتراه عن الأشرار خلال التاريخ و بعدها دور على التعويذة و لقاها على النت و نفذها زي ما انت عرفت"
-"كل ده جميل جداً و رائع لو في فيلم أجنبي أو قصة خرافية لكن في الواقع فعقيدتي بتمنعني من اني أصدق في البعث خلال الحياة لان البعث هيكون بعد الموت"
-"و مين اتكلم عن البعث؟؟"
-"أمال سيادتك بتعمل ايه هنا بعد ما مت ؟؟"
-"و مين قالك اني مت ؟؟"
-"هنبدأ بقى....اوعى تحاول تقنعني انك لسه عايش من العصور القديمة"
-"ولا دي كمان..يا خسارة كنت فاكرك أذكى من كده...كل الموضوع نقل زمني"
-"نقل زمني ؟؟!!"
-"أيوة التعويذة نقلتني من زمني لزمنكم من الماضي للحاضر لكن بسبب ان الجمجمة مكنتش كاملة فاكتفت بنقلي معنوياً أو الأقرب لذهنك اني شبح حالياً روح من غير جسد و كان لازمني باقي الجمجمة و اللي هو الفك اللي انت جبته من صاحبك عدوي عشان أنقل جسمي"
********
" لمحة من الماضي
عرف الحاضر و المستقبل من بعده بفن من فنون الماضي و جبلهم نيكرومانسر يقاتلهم بالجاثوم و يكشف أسرار موتاهم....."
********
اتغظت جداً من منطقه و ازاي الفكرة دي مجتليش قبل كده و سألته و أنا باشاور على فتحي :
-"طب ليه قتلتهم مع انهم اللي ساعدوك في الرجوع ؟؟"
-"لاني انسان بيعتمد وجوده على السرية و استحالة ده يحصل مع مجموعة من الشباب اعتادوا يفخروا بأي حاجة يعملوها حتى لو جاهروا بذنوبهم فكان لازم أخلص منهم و كان مفروض فتحي صاحبك يموت من أول مرة لكن لما اغمى عليه الجاثوم افتكره مات و سابه و ابتديت اتعقبك انت عشان تقودنا للفك و عشان كده امرت الجاثوم انه ميقتلكش على طول و لما زرت فتحي في المستشفى عرفت انه لسه عايش و ان في مهمة ازم تتم و عشان كده بردو اوحتلك انك تدمر الموقع اللي نزل من عليه السكريبت عشان يفضل في أمان للأبد"
كلامه فكرني باني قريت ان النيكرومانسر ليه مقدرة السيطرة على الأفكار فسألته :
-"رائع و دلوقتي ايه اللي هيحصل ؟؟"
-"اللي كان مفروض يحصل تديني الجمجمة و أكمل التعويذة و أجي عصركم"
-"و ايه اللي هيجبرني اني أعمل كده؟انت نسيت اني غلبت جاثومك و أقدر أقتلك زي ما قتلته؟"
و ماكتفتش بالكلام لكن حولته لفعل و أنا باهجم عليه بلكمة كافية انها تكسر فكه لكنه ماتحركش من مكانه ولا اتهز حتى مع اني باندفع ناحيته بكل قوتي لكنى فوجئت اني باندفع خلاله و كانه مش موجود و باخبط في الشباك و الحمد لله ان اندفاعي مكنش اقوى من كده والا زماني كنت كسرته و وقعت منه و سمعته بيقول من ورايا من غير حتى ما يلف وشه ليا و أنا باقوم:
-"أي نعم انت قتلت الجاثوم لكن ماتنساش ان الجاثوم قوته كلها ضد النايمين لكن ملهوش أي قوة بدنية تذكر و الا كان قتل الممرضة اللي ظبطته في أوضة فتحي امبارح قبل الفجر لكن انت متقدرش تغلبني لاني ببساطة مليش جسم و ده اللي مانعك انك تهاجمني و مانعني في نفس الوقت من اني أهاجمك....لكن في نفس الوقت متنساش اني باسيطر على الأفكار تماماً زي ما خليتك تهاجم الموقع و تجيب الفك من عند عدوي و زي ما خليت دنيا أخته تديك الجمجمة بمجرد ما رحتلهم على أساس انها هدية فتحي ليك و زي ما خليت باباك يوافق على خروجك و بياتك برة البيت أو ان كل اللي في المستشفى يناموا و ميصحوش قبل بكرة عشان محدش يقاطعني و أنا باخلص شغلي و بارجع لطبيعتي أقدر اسيطر عليك و اخليك تديني الجمجمة و الا هادمرك"
و فعلاً كان واضح انه من النوع اللي مش بيهدد من فراغ فجأة حسيت ان دماغي بقت خلاط أفكار و كلها متركزة اني لازم أسلمه الجمجمة و لف ليا و ابتدى يتكلم بمنتهى البرود :
-"لو عايز رأيي وفر عذابك و سلمني الجمجمة بسرعة لانك في كل الأحوال هتسلمهاني لاني درست شخصيتك كويس و فهمتك انت ذكي و معلوماتك كويسة عارف حاجة عن حاجات كتير و في نفس الوقت متعرفش حاجة عن أي حاجة منهم يعني مثلاً انت قريت في الأدب العربي و الانجليزي بالقدر اللي يخليك تقدر تتكلم عنهم في مناقشة مفتوحة لكن معلوماتك عنهم ولا حاجة زي بردو الأصحاب انت تعرف ناس كتير جداً بيعزوك و بتعزهم لكن مفيش حد قربت منه بالقدر الكافي عشان يكون صديق باستثناء البدين اللي نايم هنا ده و كام حالة استثنائية اتعرفت عليهم جديد و عندك اصرار للنجاح بس عمرك ما بتنجح كل ده ميؤهلكش لانك تقاومني لكن صدقني أوعدك اني هامتص كل المعلومات دي بعد ما اقتلك"
طول ما هو بيتكلم و أنا باحاول أجمع أفكاري لكن ده كان صع جداً وسط خليط الأفكار اللي هو عمال يوحي ليا بيها و أهمها اني أسلمله الجمجمة و ابتدت دماغي توجعني جداً و أظن ان خلايا مخي مش هتستحمل نشاط أكتر من كده لكن مستحيل أسلمه الجمجمة عشان يستعيد جس.....و هنا جتلي فكرة
-"خلاص....ماشي.....خدها و سيبني في حالي" صرخت فيه و أنا بارفعله ايدي و باسلمله الجمجمة فقالي اني أحطها في نص الأوضة و ابعد و اقعد في طرف الأوضة و لقيته بيتجه ليها و بيبدأ يتلو تعاويذ غريبة و يقول كلام مش مفهوم و هو بيحرك ايده حولين الجمجمة و لدهشتي لقيت زي هالة من الضوء بتطلع من الجمجمة و تدخل جسم النيكرومانسر و بعد حوالي 10 دقايق وقف و نزل ايده و ابتدى يحس جسمه و كأنه بيتأكد انه رجع و بصلي و عينه بتلمع و قال بصوته الرهيب :
-"أخيراً كملت الطقوس بتاعت نقلي..أنا متشوق جداً اني أعرف كل المعلومات اللي علمكم وصلها"
قلتله و أنا باحط ايدي في جيبي و باقرب منه في خطوات بطيئة:
- "على فكرة عجبني أوي تحليل الشخصية اللي حللتهولي و الغريب انك لمست حقيقتي فعلاً على عكس أغلب الناس اللي عرفتهم لكن ممكن تسمحلي أقولك كلمتين عنك...الأول واضح انك مبتعرفش تلعب الشطرنج و كمان انت بتسيطر على الأفكار بس لكن مش بتقراها.صح ؟؟"
ابتدى يعقد حواجبه من غير ما يرد و هو بيتابع حركتي و أنا بالف حوليه و باتكلم من غير ما ابصله :
-"ففي الشطرنج ابرع حاجة ممكن تعملها انك تخلي الخصم يتصور انه مسيطر عليك تماماً و مخليك تعمل الحركات اللي هو عايزها لكن في الواقع انت اللي بتكون ماسك خيوط اللعبة و بتقلب خطته عليك لدرجة انك ممكن تسيب وزيرك يموت في مقابل ان الحصان يموت ملكه"
و هجمت عليه فجأة و أنا باطلع ايدي من جيبي و لكمته في معدته بكل قوتي:
" و هو ده اللي عملته معاك أنا اديتك الجمجمة عشان تستعيد جسمك و أقدر أواجهك"
تراجع كام خطوة و هو جسمه متني و لما اتعدل لقيته ماسك سكينة شكلها غريب هي أقرب للساطور منها للسكينة و بيقولي و الغضب بيلتمع في عينه :
-"عجلت بقدرك"
و هجم عليا بالسكينة فرجعت بضهري و أنا بانط لورا فخبطت في القائم اللي بيعلقوا عليه المحاليل لما المرضى بيكونوا في عملية أو أي حالة عايزين يحقنوهم بسوائل لفترة طويلة و وقعت أنا و القائم على الأرض فقمت بسرعة و أنا ماسكه بايديا الاتنين قدامي و باقول :
-"قدري ليه ساعة معينة محدش يقدر يعجلها حتى أنا"
و ثبت ايدي اليمين و لفيت ايدي الشمال بسرعة في الهوا بحيث ضربت ايده اللي ماسكه بالسكينة فطارت و زحفت على الأرض لحد ما خبطت في الشباك و وقف - السكينة مش ايده طبعاً"
و ضربته بالقائم مرة تانية في فكه و بعديها في معدته فاتنى تاني و بسرعة وطيت و ضربت رجله من ورا فوقع على الأرض
كان واضح ان عامل المفاجأة شغال لصالحي و الأدرينالين اللي اتفرز في جسمي كان ليه تأثير رائع و وقفت بسرعة و رفعت القائم و استعديت أغرز في بطنه لكنه شاور و قالي :
-"لو قتلتني العواقب هتبقى سيئة جداً و ده مش تهديد أجوف"
وقفت ايدي في الهوا و حاولت اتبين في ملامحه ان كان بيكدب ولا بيقول الصدق
لكنه كمل بسرعة و قال :
-"لاني من الماضي و هاموت في الماضي فلو قتلتني هنا يبقى انت غيرت حاجة في التاريخ لاني بعلمي عالجت ناس كانت هتموت فلو قتلتني فهم هيموتوا و بالتالي ذريتهم مش هتبقى موجودة ده مثال بسيط للي ممكن يحصل"
فعلاً أنا عارف الكلام ده لكن بعد كل ده أسيبه عشان يقتلنا امال الحل يبقى ايه و غرقت في أفكاري أقتله ولا لأ و هو استغل الفرصة دي و راح شايط رجلي بسرعة فوقعت على الأرض و وقع من ايدي القائم سلاحي الوحيد ضده و هو نط على رجليه بسرعة و راح مديني برجله في دماغي خلاني أحس انها بتدور لكن هو مسابنيش احس بيها كتير انما انهال عليا بالركلات في كل جسمي بلا استثناء و لما بطل حسيت ان جسمي كله اتكسر و طعم الدم و مرارة الفشل في حلقي و مش قادر أشوف في وضوح و سمعت صوته بيقولي :
-"انت اتصورت انك هتقدر تغلبني يا أحقر الحقراء....كان لازم تعرف ان أعظم منك فشلوا فيها"
و ابتدى يتجه للسكينة بتاعته و هو مديني ضهره مطمن لاني عاجز عن القتال تماماً و ساعتها كنت لسه باحاول أقف بس على رجلي و كان لسه بيكمل :
-"لكن متقلقش أنا باهتم بتسلسل الأحداث بمعنى اني لازم أقتل فتحي قبلك لكن مش هاطول عذابك دقايق و أخليك تحصله"
و كان بيوطي ياخد السكينة و عدت في دماغي أفكار كتيرة كان أهمها فشلي في حماية صاحبي و انه هيتقتل قصاد عيني و أنا مش قادر أحميه و رفعت نظري لفتحي النايم في سرير المرض و بعد كده بصيت على النيكرومانسر و لمحت الجمجمة في نص الأوضة زي ما سابها و هو لسه بيجيب سكينته فجريت بكل سرعتي و أخدت الجمجمة و كملت طريقي ناحية النيكرومانسر و أنا باطلق صرخة عالية جداً حتى انه اتعدل بسرعة لكن بعد فوات الأوان و كنت طوقت وسطه بدراعاتي و أنا ماسك الجمجمة و كملت طريقي لحدما خبطنا بالشباك و كسرناه
و وقعنا سوا من الدور التاني للمستشفى و امتزجت صرختي بصرخة النيكرومانسر بصوت الرعد لحد ما وصلنا للأرض الجمجمة و دراعي فالنيكرومانسر و أنا فوقهم و سمعت كأن صوت عضم بيتكسر و حسيت بألم في دراعي الشمال و أنا باتدحرج من أثر الوقعة و لما اتعدلت فوجئت بالنيكرومانسر واقع على الأرض و جنبه الجمجمة مكسورة من الوقعة و وزننا فوقها و النيكرومانسر ذات نفسه ابتدى يختفي و هو بيمد ايده ناحيتي و بيقول بصوت غاضب :
-"متفتكرش انك غلبتني هالاقي طريقة و ارجع و ساعتها هاقتلك"
كنت ساعتها باستنذف اخر طاقتي و باقوله :
-"كان نفسي أقولك الى الجحيم لكن لان وسيلة مجيك لينا و هي الجمجمة اتدمرت فكده هترجع لعصرك اعمل فيه اللي انت عايزه صدقني الحاضر مش ناقصك و هو ده التسلسل المنطقي للأحداث انك من الماضي و تفضل فيه"
و اغمى عليا بعدها

تــــــــــــــــــــــــــمـــــــــــــــــــــــــــــت

موضوع: رد: 1- الهدية الجمعة فبراير 22, 2008 10:41 pm

ماشاء الله خيالك واسع جداااااااا
وان كان الموضوع مش كله خيال

بس كويس

موضوع: رد: 1- الهدية السبت فبراير 23, 2008 2:01 am

شكراً يا نادية على ردك
أهو يا ستي مخلصتوش النهاية بتاعت انه يطلع حلم
و مستني بقية الأراء

موضوع: رد: 1- الهدية السبت فبراير 23, 2008 9:22 pm

جميلة جدا ياسيربنت

بس لو عايز نقدي ياريت تدخل اللغة الفصحى في كتاباتك بس ممتازة بجد

موضوع: رد: 1- الهدية الأحد فبراير 24, 2008 3:12 am

it's a nice story.actually, u have a wide imagination,as rgards the parts related to your yelling,jumping out of the window and attempts to save ur friend seem to be ur real nature.i can't deny that u scared me & i'm wodering how i will sleep.good luck & a scary night. affraid

موضوع: رد: 1- الهدية الأحد فبراير 24, 2008 5:47 pm

here i am reading ur story from the beginning.this part is similar to 'silence before the storm . Smile

موضوع: رد: 1- الهدية الأحد فبراير 24, 2008 7:50 pm

شكراً يا كابتشينو
و كملي القصة و قوليلي رأيك

هااااااا التمن ايهههههه ؟

موضوع: رد: 1- الهدية الأربعاء فبراير 27, 2008 3:17 am

هههههههههههه

حلوة اوووووي يا سيربنت وفيها جزء بيضحك اوووي

بجد جميل جدا ورائع

بجد مش ناقص غير الا اما تتعمل فيلم (( مش بتريق ))

برافو عليك

ارفع لك القبعة يا سيربنت

مع تحياتي .... ,,,

والسلام خير ختام ... Smile

موضوع: رد: 1- الهدية الأربعاء فبراير 27, 2008 7:04 pm

شكراً يا حوكة على ردك الجميل
و الحمد لله انها عجبتك

موضوع: رد: 1- الهدية الجمعة فبراير 29, 2008 8:55 pm

امال فين الباقى

موضوع: رد: 1- الهدية الجمعة فبراير 29, 2008 9:24 pm

هتلاقيه في نفس الباب مترقمين من 1 ل 6
1- الهدية
2- النيكرومانسر
3- الجاثوم
4- اللغز
5- الهاكر
6- صراع بعد منتصف الليل

موضوع: رد: 1- الهدية الجمعة فبراير 29, 2008 9:36 pm

انت قلت فى الاول ان فيها جزء من الواقع يا ريت تقوله
وكمان بطل تتفرج على افلام رعب
لانى خلاص كنت هموت فعلا من الخوف
بس بصراحه ما شاء الله عليك تحفه جدا