Chance

موضوع: Chance الأربعاء أبريل 02, 2008 8:51 pm

السلام عليكم

أدخل في الموضوع على طول ان في طب في العادة كل دفعة بتعمل عمل خير
على أساس انها حاجة يتجمعوا عليهم كلها و يأخدوا أجرها و ثوابها فمثلاً
دفعة أخويا الكبير من و هم في الكلية عملوا
مشروع الجنيه الشهري انهم كل شهر يجمعوا من بعض من كل واحد على الأقل جنيه
و يوجهوا المبلغ ده لعمل خير و كان من أبرز أعمالهم رعايتهم لملجأ الأيتام
اللي قصاد باب الكلية ناحية المترو و فتحوا فيه غرفة جديدة و زودوهم بأثاث
و كمان متكفلين بطفل فيهم و في سنة خامسة و ساتة كانوا بيضحوا بعجل في كل
عيد أضحى باسم الله ما شاء الله عليهم و بالنسبة لدفعة خامسة و سادسة
الموجودين حالياً فهم تقريباً المسؤلين عن رابطة مساعدة الأطفال المرضى و
هكذا لكل دفعة

من المبدأ ده ابتديت أنا و أصحابي نفكر في حاجة تجمع دفعة أولى و
بقيت الدفعات بس الأساس يكون من أولى و كالعادة المشروع الطبيعي هو رعاية
ملجأ للأيتام و هنا بدأنا نفكر ازاي نخلي الفكرة جديدة فالأعضاء اقترحوا
ان احنا نرعى الأطفال دول كأنهم أطفال مننا مش في المعاملة المعنوية بس لأ
و المادية كمان و ان مشروعنا ده يستمر معاهم إلى ما شاء الله هنا فكرنا في
المشكلة التانية ان احنا عايزين ملجأ أيتام يكون صغير عدد أطفاله ميعدوش
ال15 عشان كبداية لينا نقدر نرعاهم و كمان انه ميكونش في العباسية لان كل
الدفعات تفكيرها في الأغلب بيتجه لملجأ المواساة ( و عدد الأطفال فيه معدي
ال 150 ) و كمان الملجأ اللي قصاد باب الكلية و شرط كمان انهم يكونوا
أطفال صغيرين مش كبار بحيث ان احنا نبدأ معاهم و تكون لينا اليد العليا في
تربيتهم و التأثير فيهم قبل ما أي حد يعمل كده لان الطفل ده زي الأرض أول
واحد بيزرعها هو اللي بيحدد هتطرح ايه و صعب بعد كده تغير في طبيعتها
بسرعة و بدأنا ندور و الحمد لله لقينا ملجأ فيه كل ده و هو ملجأ دار
المصطفى للأيتام في سرايا القبة " في وسط الطريق بالظبط بين محطة سرايا
القبة و حمامات القبة " و هو فيه 8 أطفال أكبرهم تموا السنتين في شهر
ابريل اللي فات و هو تابع للجمعية الشرعية الاسلامية بس الدعم أقل من
الاحتياج و مع ذلك حالته كويسة الدار و الأطفال في منهم أيتام و منهم
لقطاء

توكلنا على الله و قررنا انه يكون هو ده هدفنا المبدئي و الكلام ده
كان في شهر مارس اللي فات و أول زيارة ليه تضمنت دعم من عائلتنا و
أصدقائنا المقربين أوي في الكلية و الحمد لله جمعنا مبلغ 1100 جنيه صرفنا
منهم 800 ما بين أكل و ملابس و لعب و ألبان و بامبرز بكميات تكفيهم لفترة
لا تقل عن شهر و ال300 الباقيين جمعنا عليهم تاني بردو من الناس المقربين
و عملنا زيارة في نص شهر ابريل و عملنا فيها حفلة عيد ميلاد مجمع للأطفال
عشان 4 منهم تموا السنتين و جبنا بردو حاجات تغطي احتياجات الأطفال شهر
مايو و جزء من شهر يونيو عشان هنغيب فيه عنهم عشان الامتحانات و ان شاء
الله هنعمل زيارة أول ما نخلص الامتحانات قبل ما شهر يونيو يخلص

بالنسبة لاسم Chance فده معناه ان احنا فرصة للأطفال دول ان احنا
نغير مستقبلهم أو على الأقل نحسنه و نسيب لهم
ذكرى كويسة و في نفس الوقت
انهم هم فرصة لينا لدخول الجنة
وملخص اللى عملناه من الوقت ده لحد دلوقتى :
_ عملنا كذا زيارة فى الدراسة وطول فترة الاجازة كنا بنجبلهم احياجاتهم فيها على اد ما نقدر
_ان احنا عملنالهم عيد ميلاد مرتين
_ورحلة كانت لوندر لاند يوم 28_7_2007
_دورنا
على دور تانية ولقينا اتنين واحد منهم مش هتتتخيلوا انه بيضم ناس كنير جدا
من سن شهر لحد 20 سنة وفيه كمان ناس كبير يعنى كمان دار مسنين والناس اللى
بتكبر فيه هى اللى بتربى الاطفال اهو الملجا ده بيعيش على التبرعات اللى
بتجيله فى رمضان ((الوقت اللى ناس كتير فيه تفتكر تعمل خبر وتبرعات ))
المهم ان احنا قدرنا نوفرله كمية كبيرة من الهدوم لاعمار كتير وكمان لبس مدارس والحمد لله

_اما الملجا التانى فهو فيه 10 اطفال فيه منهم اقل من سنة وفيه بين سنتين وواحد فى الحضانة
وده اللى احنا بنرعاه حاليا

_قدرنا نعمل عدد من شنط رمضان ونوزعها على ناس محتاجاها هو العدد كان قيليل بس كويس كبداية
-و بمساعدة الطبيبة شاهندة خيري نايب زاير بمستشفى الدمرداش للأطفال قدرنا نعمل مسح طبي للدار بتاعت المطرية و اشترينا لهم أدوي
ملنا جروب فيه تقرير عن الزيارات و صور للزيارات دي و كمان الوصولات و الفواتير اللي اشترينا بيها الحاجة موجودة

********

و فيه جروب على الفيس بوك

*********

و مجموعة خاصة هنا على المنتدى
كاتب عن الموضوع هنا ليه بقى .... أكيد عشان لو حد فيكم يحب يشاركنا
فأهلاً و سهلاً بيه سواء دعم مادي أو انه ييجي معانا في الزيارات اللي
هنعلن عنها قبلها عشان العدد في الزيارة بيكون أقصاه 10

موضوع: رد: Chance الإثنين أبريل 07, 2008 12:43 am

حبيت بس أعلق على اننا معملناش حاجة في يوم اليتيم لسببين
أولهم طبعاً ان امتحانات العملي بدأت و كل سنة و انتم طيبين
ثانياً و ده الأهم احنا مش عاملين الموضوع عشان يوم اليتيم بس و بالعكس بنتعمد منعملش حاجة في اليوم ده عشان كمان كتير مننا مش مقتنع بفكرة اليوم ده